Somos federación.

Acabo de chegar da Asemblea Xeral Extraordinaria da FAVEC, que comezou ás 10:30h desta mañá, e na que o único punto da orde do día era a elección de nova Comisión Permanente.

A reunión arrancou coa tentativa da Comisión Permanente saínte, de que ao haber unha única candidatura presentada non se celebrase votación e fose “automaticamente” designada. Non estivemos de acordo, e intervín na asemblea defendendo que se votase, xa que é o único xeito no que as asociacións podían expresar libre e democraticamente o seu aval ou oposición á candidatura plural que presentaramos. Moi mal sinal sería principiar un mandato, que foi resultado dun proceso democrático de censura, sen que as asociación federadas manifestaran o seu acordo ou desacordo coa nova equipa. Queremos devolverlle o poder á asemblea, e hoxe tivemos a primeira oportunidade para o facer; e fixémolo.

Finalmente houbo votación, e por petición dunha entidade, esta foi secreta mediante voto en urna. Nada que obxectar ao procedemento -que ningún dos presentes lembraba que se tivese utilizado nunca antes na historia da FAVEC-, inda que como alí se dixo non está de máis recordar que tan democrática, legal e transparente é a votación a man alzada coma o voto en urna.

O resultado da votación foi claro e taxante:

  • Nº electores: 35 asociacións federadas.
  • Votos emitidos: 25 (Participación: 71,42%)
  • A prol da candidatura: 20 (80%)
  • En contra: 3 (12%)
  • Branco: 2 (8%)
  • Nulo: 0 (0%)

De aí que o novo equipo directivo da Federación de Asociacións Veciñais “Eduardo Chao” de Vigo, respaldado cun 80% dos votos, sexa o integrado por:

  1. Presidenta: María Pérez González (A.V. Pontenova-Freixeiro)
  2. Secretario: Xabier Pérez Igrexas (A.V. Val do Fragoso)
  3. Tesoureiro: Carlos Formigo Oliveira (A.V. de Coruxo)

Vogais:

  1. Transporte, medio ambiente e litoral: Francisco Piñeiro Lorenzo (A.V. de Navia)
  2. Infraestruturas e urbanismo: Valentín Bernárdez Ron (A.V. O Carballo)
  3. Benestar social e igualdade: Ana Pérez Davila (C.V.C. de Valladares)
  4. Cultura e promoción veciñal: Eduardo Fernández Pérez (A.V.C.D. Lavadores)
  5. Sanidade: Xosé Manuel Fernández González (A.V. A Paz)

Resta apenas o trámite formal do traspaso de poderes que terá lugar, perante notario, o vindeiro martes 29 de xuño.

Quero agradecer desde aquí e con total sinceridade o apoio recibido, e aplaudir o exercicio de democracia que tivo lugar esta mañá, e que fico certo de que abre unha nova etapa no movemento veciñal vigués. Temos motivos para felicitarnos todas e todos.

Desde hoxe, deixamos de ser 19 asociacións críticas (como se nos alcumou nos medios), para volver a ser con anovado compromiso FEDERACIÓN VECIÑAL. As persoas que conformamos a nova Comisión Permanente temos diante de nós retos importantes, e tarefas que sabemos non serán doadas, pero asumímolos ilusionadas e ilusionados, conscientes iso si da responsabilidade que vimos de aceptar, pero coa certeza de que desde hoxe imos contar coas 35 asociacións federadas, para seguir a facer máis movemento veciñal.

Porque como dixemos na rolda de prensa de febreiro (cando arrancou todo este proceso): somos federación, somos movemento veciñal.

Acerca de Xabier P. Igrexas

Secretario da Federación de Asociacións Veciñais de Vigo "Eduardo Chao" (FAVEC). Desde 1998 participa do movemento veciñal vigués. Neste blogue fala da cidade de Vigo e a súa veciñanza desde a óptica dalguén que fai parte do movemento veciñal.
Esta entrada foi publicada en Movemento veciñal e etiquetada , , , . Garda a ligazón permanente.

2 respostas a Somos federación.

  1. Pingback: Punto final | Desde o barrio

  2. Pingback: Punto final | Contradiscurso

Os comentarios están pechados.