Hai uns días, ao fío dunha noticia publicada no suplemento Vigo 4 Costados de Faro, comentei publicamente nas redes sociais a miña preocupación, como Secretario da FAVEC, arredor da problemática que afecta á AV de Lavadores, afirmando que:
De confirmarse o que denuncian varios ex-presidente e ex-directivos desta importante asociación veciñal, esa actuación non só non pode contar co meu aval nin respaldo, senón que é frontalmente incompatíbel co que a maioría do movemento veciñal quere e impulsa desde hai un ano na Federación Veciñal de Vigo. A reivindicación de democracia, independencia, transparencia e respecto á pluralidade non poden ser meras consignas, son valores que todas e todos debemos prácticar en todos os ámbitos, na federación e nas asociacións.
Unha carta ao director publicada hoxe en Faro de Vigo engade inda máis argumentos a esa preocupación. Se o que relatan foi o que sucedeu, retrata un xeito de proceder claramente antidemocrático que quen facemos parte da Comisión Permanente FAVEC non só non compartimos senón que mesmo combatemos na propia federación.
Desde o respecto fraterno e completo á independencia orgánica desa importante asociación veciñal, sen ánimo de intromisión algunha, só me cabe desexar que esta situación se resolva de xeito favorábel para a propia entidade e o conxunto do movemento veciñal no menor lapso de tempo posíbel.
